Cuko savjetuje: Evo kako da perete zube vašem psu

Pranje zuba vašeg psa vrlo je bitan dio dentalnog zdravlja. Cuko.me je već pisao o važnosti zdravih zuba, kao i načinima da ih održite (članke možete pogledati pod pojmom “zubi” OVDJE), a ovog puta vam donosimo savjete kako da na najlakši način operete zube vašeg ljubimca.

Čisti zubi i redovno pranje sprečavaju bolesti desni, loš zadah, i čitav niz drugih problema, ističe veterinarka Keti Nelson.

Ako imate mladog psa, bitno je da sa praksom pranja zuba krenete odmah. Tako ćete od pranja zuba stvoriti ugodno iskustvo za ljubimca.

Stavite ruke nježno u njegova usta, i obezbijedite kolačić kao nagradu, tako da isto iskustvo u budućnosti razumije kao pozitivnu stvar.

Veličina psa je bitna, s obzirom da je važno odabrati pravu pastu i četkicu. Kod manjih pasa, koristite kraću četkicu, dok kod većih pasa koristite četkicu sa dužom drškom.

Paste koje se koriste za pse su obično sa nekim ukusom, kako bi iskustvo cuka bilo prijatnije. Ne koristite ljudske paste, jer mogu sadržati ksilitol koji je opasan po zdravlje pasa.

Proces pranja zuba

Prije nego što krenete, pustite psa da onjuši pastu i četkicu. Možete staviti malo paste na ruku, kako bi je pas tako onjušio.

Zube psa perite u periodu dana kada je najopušteniji. Nemojte da pritiskate psa, već sjedite ili kleknite pored njega. Podignite njegove usne, kako bi lako pristupili zubima i desnima. Ako se pas protivi, odustanite i probajte kasnije. Bilo kakvo prisiljavanje vam neće donijeti ništa dobro, jer će pas stvoriti negativno iskustvo.

Zube perite pod uglom od 45 stepeni, jer se tako nečistoća bolje uklanja. Zube perite kružnim laganim pokretima.

Kod nekih pasa je lakše započeti na jednoj strani, završiti tu stranu i onda preći na drugu stranu.  Pranje zuba traje oko dva minuta.

Krenite sa jednim pranjem nedjeljno, pa kako se pas navikava, zube mu perite dva do tri puta nedjeljno. Što više perete zube, to će zubi biti zdraviji.

Kada operete zube psu, nagradite ga ili provedite neko vrijeme sa njim. To će učiniti da se bolje osjeća, te da pranje shvati kao pozitivnu stvar.

U slučaju da primjetite krvarenje tokom pranja zuba, to znači da ili previše grubo perete zube svom psu, ili ima neki dentalni problem. U bilo kom slučaju, potražite savjet veterinara.

I ne zaboravite, strpljenje i nagrade su najbolji način da pranje zuba bude ugodno i za vas, i za vašeg ljubimca.

Komentariši

Vaša email adresa neće biti objavljivana.